Una bella poesia in sardo di Pier Gavino Sedda
Emigrados gavoesos.
Po fagher sos augurios de bon’annu
Mi soe postu a contare emigrados
Chi dae Sardinna nos suni’ mancados
Foras de Italia b’at muntone mannu.
Si no ap’ingannu e nen cunfusione
Como m’assento po fagher memoria
d’emigrantes tenimus ricca istoria
leadu an differente s’istradone.
In d’unu cuzone australianu
Angelo Chisu resurtada in Toowumba
Prus de barant’annos ch’est a runda
E nos ghirat frequente su paesanu.
Lontanu zai s’at fattu posizione
Triballande cun d’unu ristorante
Unu fizu lu tenet insegnante
Ch’est in tempus de zubilassione.
Unu nepode li poned’ infattu
In su matessi gampu triballante
E issu puru zai vivede accante
Su tempus e sa sorte l’est addattu.
Fattu ada unu viazzu a cussu logu
Sara Maoddi resurtat in cue
bi nd’at disterrados in totue
e in Olanda b’at Sergio Delogu.
In disaogu Paola americana
In Martinicca zai s’est sistemada
Est mastra ‘e iscola bene preparada
Ma de ghirare non de tene gana.
Ana partidu a terra franzesa
Giuliana Mulas e Paola Sedda
E Alfredo Cadau ch’est prus indedda
in Rosario sa familia pesa(t).
Attesa est sa Thailandia po Marieddu
Po’ sonare assimizat a Peppinu
Ad’astru po pintare in su camminu
De sos Marches za tenet s’arrampeddu.
Nieddu, za’ che ‘u mannu, ch’est andau
A Nova York in terra americana
Inive si ch’est mortu in terra istrana
In s’urna sa muzere l’at ghirau.
M’an numenanu a Franziscu Pitzolu
Chi s’agattat in Belgio collocau
Cun sa familia a ive ch’est parau
Mi pare ch’est naschiu in Pudajolu.
Su bolu Antoni Mura s’at leadu
In Germania s’est deppiu sistemare
Accante a Istoccarda a traballare
Si ch’est a Oroteddi cojuvadu.
Cando so’ andadu a l’abbisittare
Cun atteros cumpanzos de Gavoi
Nos at trattadu cun sa manu goi
Semper in domo issoro ud’a abbarrare.
Est a pistare Pauleddu Brulleri
A Corsica si ch’andada frequente
Torrada a abbisitare sos parente(s)
li dimando de novas in zilleri.
S’aperi’ s’universu de pintore
Siro Cugusi bene sistemadu
Da Franza a America est andadu
In s’accademia ‘e Sassari duttore.
Esposidore in tottu su mundu
In Londra, California e Basilea
Finas Zuseppe at sa matessi idea
Sighit in Francia su frade segundu.
Totu in su mundu za sunis a ziru
Alberto Sedda zai ch’est in Ispanna
Marco Cugusi de sa Corte manna
In Germania est fattende su retiru.
A tiru a tiru los semus contande
Mereu Luisanna e Carla Mereu
Sun’in Germania las azude Deu(s)
E Nino Loddo inive est abitande.
Istande est Anna Lai in Berlinu
Pietro Conzu sa matessi nazione
Mario Sedda puru in cuss’unione
In Francia Pietro frade de Bertinu.
Su camminu e s’Olanda ana picau
Ghisu Istevene e Michele Canio
Un’attera chi dae meda no la bio
Marianzela Chisu, m’an’ammentau.
Contau zai che nd’appo una trintena
Ateros puru bin nd’ada attesu
Antoni Sanna in su Lussemburghesu
Marchi Pier Paolo faeddat inglesu.
Peppe Manca de s’Olanda est in mesu
Enrico Nanni in Londra abitadore
Pare de economia professore
E Gemma Sedda in chelu Londinesu.
In mesu Isvizzera Simona Pira
Marco de cudda casta de Mereu
Alessandro de Pina Lai s’ereu
In Australia e semper tira tira.
Mira in Belgio bi nd’ada atteros duos
Anzela e Mario chi sunis frades
De sos Anechis a proerju nades
Cugusi sos sambenados suos.
A sos concruos semus arribande
Sarvu si non mi nd’appo irmenticau
Luisa Pullara a Belgio at cojuvau
Chiara Mulas in Franza est abitande.
Illonghiande mi ch’este sa faina
Bi nd’at carc’una in fora residente
Ma deppo dimandare a atera zente
In Germania b’est Fois Zuseppina.
Franco Angius inive si cumbina’
Foras de Italia b’est muntone mannu
Po fagher sos augurios de bon’annu
Andrea Buttu preide in Argentina.
Gavoi 28.12.2017
Pier Gavino Sedda
