A su Cuncursu sunt istados presentados 17 Binos, su prus chi at fatu puntos est istadu su Binu de Paule Sedda-Pira
Eris merie a tardu in su Magasinu de InnAssi Urru, su Babbu de Matias su Presidente de su Taloro, cumente onzi annu antis de su Covid, s’est torradu a cominthare cun un’ Atoviu de Binzateris, chimbe cun Binzas mannitas e minores, in Sa Mata, Zubanne Maria Pinna, Gianfranco Sedda e Zicu Pira in Miriddé, Curuné Perazorzi Pira,
Amantiosos chi si faghent su Binu in Domo comporande s’Achina dae totube, intendidores e ghias de su Taloro e mescamente Bufadores, su bonu de Gavoi peroe finas istranzos, Arzentinos, Maltesos, Ingresos Casteddarzos e gavoesos de su Disterru, bennidos pro sa casione o capitados in bidda e cumbidados.
Cumente onzi borta a su Cuncursu de sos Binos amaniados in Gavoi, medas nde faghent finas a 6.000 litros e lu bendent iscapu in Gavoi e totu, pro azudare in sos gastos, comporare s’achina, e la binninnare, a che la ghirare e azudos pro la traballare.
Una ” minieconomia” pro su piaghere de bufare una tassa de Binu sana.
S’ateru sensu de custu Cuncursu est sue azudare, cun Azionariau pupulare su Taloro Calcio chi dae 25 annos, s’Iscuadra chi s’est arrepeddada de prus in s’Ecellenza de su fubalu in Sardinna.
A su Cuncursu sunt istados presentados 17 Binos chi a Parrer de s’ONAV, su Sotziu de sa Provintzia de Nugoro de sos Assazadores de Binu reconnotos in su Sotziu de s’Istadu Italianu e Europeu.
Sos Assazadores, sighinde Protocollos istudiados e aprovados, non solu ant dau sos puntos ma, su chi interessavat de prus, Cussizos pro mezorare sos Binos, moende dae sa Vinza e cumente yratare achina e mustiu, trabasare e agolostire dae sos isterzos
Adatos e limpios a sos logos uve lu fagher buddire e agolostire.
Binos chi no essende tratados cun medichinas si che bufant intro de s’annu cun grandu piaghere de sos bividores e no.
Torrande a su cuncursu su prus chi at fatu puntos est istadu su Binu de Paule Sedda-Pira, funzionariu de s’Ufitziu de sas Intradas in Bari, su Segundu Aldo Buttu chi at picadu s’Achina dae Samugheo, mistura Mandrolisai, Muristellu, Monica, Cannonau, totu a su 30% e unu 10% de ateras achinas issoro.
Terzu su Binu chi dae 27 annos fagho cun Pier Gavino Sedda in Domo sua e presentadu a numene meu a sa pari, semper terzu, cun Michele Lavra Lepas cun unachina Mandrolisai de Atzara. Sue Piergavino e meu, unu binu nieddu Tostu de Isprene cun una lassadedda abucada cumente agradat a su Mere e a sos Gavoesos. Sue batoro unu Binu Cannonau Ozastrinu de Cardedu presentadu dae Pier Gavino Sedda e totu.
S’urtima borta de su Cuncursu in su 2019, Binos de sa Binninna de su 2018, sos primos tres sunt risultados de sa Gantina de Peragabini, su primu Presentadu a numene meu. Sue 4 de Aldo Buttu connadu e Omero Marchi fizolu meu.
Sos annos antis in sos primos tres sun resultados binos de Tonino Podda e Micheli Dore Zordanu, Angelo e Romano Lavra, Bobore Maoddi Perdeddu, Alessandro Sedda Buchiarbu e ateros chi como non mi benint a conca.
Sos Mamujadinos, Orgolesos e Ulianesos, Durgalesos e de su Mandra-Olisai non depent timer Cuncurrentzia, pro commo, peroe si su tempus sighit a cambiare e nos benit in conca de ponnere a Binza sa Tanca de Lidana, sos Leporitzais e Thocoromasi, tancas e cussorjas interi sos 900- 1000 metros . . . . non si ischit 
.
Pro commo sighimos a ponnere Patata e a fagher Casu Fiore Sardo ” Gavoi” a pustis amos a biere.
Iscrittu dae Antonio Marchi Soru
